Владимир Попов
КОМИ ПЫВСЯН
Ылӧдз нималан да кывсян,
Коми войтырлӧн пӧсь пывсян,
Тӧдса мыгӧрнад нин коран,
Сотысь рунад нэмсӧ колан.
Тӧвнас, кӧдзыдыс кор лыйсьӧ,
Тэтӧг небзяс ӧмӧй лысьӧм?
Сотысь руа гор вом восьтам –
Содтӧд жарсӧ запас босьтам,
Медым медся чизыр тӧвсьыс
Эгӧ повзьӧй — ачыс ӧвсис.
Аттьӧ, аттьӧ, коми пывсян!
Весьшӧрӧ мӧй ылӧдз кывсян?
Но и гожӧмнас, кор сідз нин
Жарсьыс ачымӧс не видзны,
Лӧддза-номъя видз выв бӧрын
Асьным быттьӧ сэк рай шӧрын.
Бара лӧсьыд, бара долыд –
Ветлӧ кокньыдика лолыд.
Быттьӧ шыбитім во дасӧс,
Бара страдуйтны ми дасьӧсь.
Бара томмим, бара выльмим,
Быттьӧ кыськӧ содіс вынным!
Аттьӧ тэныд, коми пывсян!
Весьшӧрӧ мӧй ылӧдз кывсян?
Аттьӧ, аттьӧ, коми пывсян!
Он ӧд весь вель ылын кывсьы!..
пывсян ʻбаня’
кывсьыны ʻславиться’
пӧсь ʻжаркий’
мыгӧр ʻсилуэт’
сотны ʻобжигать’
лыйсьыны ʻтрещать (о морозе)’
небзьыны ʻсмягчаться’
лысьӧм ʻтело’
гор вом ʻотверстие в печи’
содтӧд ʻдополнительный’
чизыр ʻпронзительный’
ӧвсьыны ʻперестать (дуть)’
аттьӧ ʻспасибо’
весьшӧрӧ мӧй ʻзря разве’
гожӧмнас ʻлетом’
не видзны ʻне спасти’
лӧддза-номъя ʻсо слепнями и комарами’
быттьӧ ʻкак будто’
лӧсьыд ʻприятно’
кокньыдика ʻлегонько’
шыбитны ʻотбросить’
страдуйтны ʻсенокосничать’
выльмыны ʻобновляться’
кыськӧ = кытыськӧ ʻоттуда-то’
содны ʻприбавляться’
ылӧдз ʻдалеко’
вель ылын ʻдовольно далеко’
он ӧд весь ʻне зря ведь’
