Ананий Размыслов
* * *
Пемыд вӧр, тэнад кӧніджык пом?
Кӧні пемыд тіль помасьӧ тэнад?
Кымын пӧткалысь пӧткӧдлін вом?
Кымын зверӧс тэ быдтін ас дінад?
Тэныд шутьлялӧ чизыр вой тӧв,
Сыкӧд ӧтвылысь ӧтнадлы сьылан.
Тэнад сьӧлӧмад – гожӧм кӧть тӧв –
Ӧткодь сьыланкыв лэбалӧ-кылӧ.
Сӧмын радейта сьӧлӧмсянь ме
Тэнӧ гожӧмын, арын, кӧть тӧлын,
Кыпыд сьӧлӧмӧн тувччала век
Мойдысь вӧр пытшті, векньыд туй пӧлӧн.
Ме пыр казяла тэнсьыд кузь мӧвп,
Тэныд сы вылӧ вочакыв видза.
Козъя сьӧд вӧр, тэ муса мен зэв,
Шог и гаж тэнад сьӧлӧмӧдз йиджӧ.
пом ʻконец’
тіль ʻглухой лес, чаща’
пӧтка ʻдичь’
быдтыны ʻвзращивать’
пӧткӧдны ʻнасытить’
чизыр ʻпронзительный’
вой тӧв ʻсеверный ветер’
шутьлявны ʻнасвистывать’
лэбавны-кывны ʻлетать и слышаться’
сьӧлӧмсянь ʻот всего сердца’
тӧлын ʻзимой’
тувччавны ʻступать’
пӧлӧн ʻвдоль’
мӧвп ʻмысль’
вочакыв ʻответ’
козъя ʻеловый’
йиджны ʻпронизывать’
