МЫЙЛА НӦ, ШОНДІӦЙ, ВӦР САЙӦ ЛЭЧЧӦМЫД
Мыйла нӧ, шондіӧй, вӧр сайӧ лэччӧмыд,
Му вылӧ ыстін сьӧд вой?
Мыйла нӧ, мича ныв, омӧля вӧччӧмыд,
Абу нин важ кодь тэ збой?
Тэнӧ ме ӧтикӧс радейтлі, окавлі,
Некор эг шулы лёк кыв,
Кырныш моз, варыш моз тэнӧ эг кокавлы,
Тӧдан тэ сійӧс, бур ныв!
Нинӧмла, мусаӧй, сьӧлӧмтӧ повзьӧдны,
Шогсьыны, бӧрдны быд лун.
Сьӧлӧмыд кулас кӧ, сьӧкыд нин ловзьӧдны,
Олӧмыд водзӧ оз мун.
Мича шӧвк платтьӧтӧ ӧдйӧджык пасьтавлы,
Синватӧ чышкы дзик пыр.
Мый ӧні вӧлӧма – мӧдысь эн казьтывлы,
Пузьӧдлы ассьыд том вир.
Кутам ми сьылігтыр му вывті ветлыны,
Шогыд кӧ тэнад оз ло.
Дугдам ми кымӧра лунъяссӧ тӧдлыны,
Кӧть сэсся олам сё во!
вӧр сайӧ ʻза лес’
ыстыны ʻпосылать’
вӧччыны ʻнаряжаться’
важ кодь ʻпо-прежнему’
окавны ʻцеловать’
лёк кыв ʻплохое слово’
кырныш ʻвóрон’
кокавны ʻклевать’
нинӧмла ʻнезачем’
шогсьыны ʻпечалиться’
кувны ʻумереть’
водзӧ ʻдалее’
шӧвк платтьӧ ʻшёлковое платье’
чышкыны ʻвытирать’
мӧдысь ʻв другой раз’
пузьӧдны ʻвскипятить’
сьылігтыр ʻраспевая’
му вывті ʻпо земле’
дугдыны ʻпереставать’
сё во ʻсто лет’
