В. Размыслов
ЭСКӦЙ КӦТЬ ЭН
Кор меным юӧртісны, мый аддзылӧмаӧсь Сыктывдинскӧй районса Озёл сиктын олысьяс, первойсӧ думышті: ылӧдчӧны. Сэки жӧ окота лоис сёрнитны йӧзыскӧд. Звӧниті сиктсӧветас. Председательыс А. В. Прокушев висьталіс, мый ачыс абу аддзылӧма, но тӧдӧ, кодъяслы син улас веськавлӧма.
...Сиктсӧветӧ пыралӧм бӧрын муні М. С. Лыткина ордӧ. Буретш сійӧ медводз казялӧма. Мӧді юасьны.
— Тайӧ вӧлі декабрь 26 лунся асылын, — висьталіс Мария Семёновна, — кӧнкӧ 7 час 20 минут — 7 час 30 минут гӧгӧрын. Маслозаводӧ буретш воис машина ректысьны. Сувтіс лэбулӧ. Нина петіс видзӧдлыны, кутшӧм йӧв вайисны. Уджыс вӧлі уна. Тэрмасим. Ме петі бӧрынджык. Ывлаас югдӧ нин вӧлі. Сэзь. Кодзувъяс эз нин тыдавны. Друг син улӧ усис лун югыд рӧма электрическӧй лампа модаа лэбысь предмет. «Тасьті»... Буретш сы йылысь мыйлакӧ думышті. Кӧть эськӧ некор эг веритлы. Сӧрӧмӧн лыддьылі. «Тасьті» гӧгӧрас быттьӧ кодзувъяс ӧзйисны. Эз дзирдавны, а буретш ӧзйисны крест кодь югӧрӧн. «Тасьтіыс» кайис быттьӧ йӧткасьӧмӧн. Ӧддзӧдчылас — ньӧжмӧдлас, ӧддзӧдчылас — ньӧжмӧдлас. Оз самолёт моз. Найӧ сикт весьттіыд быд лун лэбалӧны, тӧда. Кайис быттьӧ ты дорсяньыс, вӧр ді сайсяньыс. Сэсся юрӧ воис: меным, гашкӧ, кажитчӧ да чукӧсті Нинаӧс.
Водзӧ висьталӧ Н. В. Лыткина:
— Кор менӧ горӧдіс Маша, повзи. Мися, пӧжар али мый кӧнкӧ. Петі лэбувсьыс да аддзи «тасьтісӧ». Кажитчӧ, быттьӧ Озёл весьтӧд лэбӧ. Некутшӧм шы оз кыв, а лэбӧ. Лунвывсяньыс войвывлань. Бӧрас нинӧм оз коль. Кайигас надзмӧдлас — ӧддзӧдлас, надзмӧдлас — ӧддзӧдлас. Вылӧ кодь нин кыпӧдчис. Сэсся Соняӧс горӧді.
С. П. Потапова:
— Кор ме петі, сійӧ вӧлі вылын нин. Но аддзылі. Югыд. Но синтӧ оз ёр. Ичӧтмис и ичӧтмис. Сэсся вошис. Татшӧмсӧ некор на эг аддзыв.
Кывзі став тайӧ висьтасьӧмъяссӧ да думайтсьыны кутіс. Мый, гашкӧ, и ещӧ на кодкӧ аддзывліс. Сідзи и вӧлӧма. Ещӧ куим морт сюрис. Сёрниті ставныскӧд. Т. В. Лыткина тавося декабрь 24 лунӧ асывнас аддзылӧма ӧшиньӧдыс.
— Кӧкъямыс часыс эз на вӧв, — висьталіс Татьяна Васильевна, — гортын мыйкӧ нокси. Чӧвті синмӧс ывлаас да казялі сійӧс. Тӧлысьысь ичӧтджык да югыдджык. Думайті первойсӧ, гашкӧ, планета. Вель дыр ӧти местаас ӧшаліс. Ёна видзӧді. Гӧгрӧс, быттьӧ тасмаа. А тасмаыс пемыдджык... Сэсся кагалысь гачсӧ вежи. А кор бара чӧвті синмӧс, нинӧм нин эз вӧв.
Ог тӧд, мый шуны Озёлса дивӧ йылысь. Ачым эг аддзыв нинӧм. Но та мында йӧз ӧта-мӧдыскӧд сёрнитчыны, думайта, эз жӧ вермыны. Дай мыйла налы пӧръясьнысӧ. Ставныс верстьӧ войтыр. Гашкӧ, тэ, дона лыддьысьысь, ачыд мыйкӧ висьталӧм кодьсӧ аддзылін?
Слова к тексту:
эскыны — верить
юӧртны — сообщить
ылӧдчыны — обманывать
окота — охота
звӧнитны — звонить
сиктсӧвет — сельсовет
мӧдны — здесь: начать
кӧнкӧ — где-то
ректысьны — разгружаться
лэбув [лэбул-] — навес, тент, укрытие
тэрмасьны — торопиться
югдыны — рассветать
сэзь — безоблачный, ясный
тасьті — миска, тарелка
веритны — верить
сӧрӧм — ложь, вранье
югӧр — луч
кайны — подняться
йӧткасьны — отталкиваться
ӧддзӧдчыны — ускоряться
ньӧжмӧдны — замедляться
весьтті / весьтӧд — над
чукӧстны — позвать, кликнуть
пӧжар — пожар
ёрны — слепить
ичӧтмыны — уменьшаться
думайтсьыны — думаться
вель — довольно
ӧшавны [ӧшал-] — висеть
тасма — ремень
дивӧ — диво
буди — видимо, видно, должно быть
