Е. Игушев
ВОЙПЕЛЬ
Важысянь коми йӧз кӧдзыд тӧв нимтӧны Войпельӧн.
Войпель кывйын «вой» юкӧныс гӧгӧрвоана, сійӧ пасйӧ войвыв, кысянь пӧльтӧ кӧдзыд. А мыйла мӧд слогас — «пель»?
Ёна важӧн йӧз Войпель пыдди шулӧмаӧсь кык торъя кыв: Вой Пӧль — войвывса пӧрысь дед, — Выль вося гаж вайысь пӧль, кыдзи рочын — Дед Мороз, удмуртъяслӧн Тӧл бабай (тӧл «тӧв», бабай «пӧль»), венгръяслӧн — Тэл апо (тэл «тӧв», апо «пӧль»). Коркӧ сэсся кык кывсьыс артмис ӧти. Коми сёрнисикасъясын тшӧкыда бӧръя слогын небыд согласнӧйкӧд орччӧн ӧ пыдди кылӧ э. Эжва горулын, Удораын, Изьваын сотчӧм пыдди кылам сотчем, сёрӧдз пыдди сёредз. Тадзи жӧ лои и Вой Пӧль кывкӧд, кор кык асшӧр кывйысь лои ӧти сложнӧй Войпель.
Слова к тексту:
войпель — бог северного ветра, северный ветер
важысянь, важсянь — с давних пор
мыйла — почему
пыдди — вместо
торъя — отдельный
тшӧкыда — часто
бӧръя — последний
кывны [кыл-] — слышать
горув [горул-] — низовье
сотчӧм — горение, пожар
сёрӧдз — допоздна
асшӧр — самостоятельный
сложнӧй — сложный
