В. Торопов
ЮКВА
Микол Ӧльӧксан кодь вӧр-ва радейтысь мортыд гежӧд. Мӧдӧдчас кӧ кыйны чери, сійӧс оз кут арся шляка ни тувсов ытва, тӧвся турӧб ни гожся пӧжысь шонді. Сылӧн пыр дась нопйыс. Быттьӧ бур мастерлӧн инструмент тыра ящик, сэсь позьӧ аддзыны быд пӧлӧс сёян-юан: консерв банкаяс, чай, сакар, шыдӧс, гормӧг, лаврӧвӧй кор. Кыйсян кӧлуй пӧвстын быдсяма вугыръяс, нидзувъяс, вугыр кӧвъяс.
Ӧльӧксан во-мӧд сайын ышӧдіс менӧ ротъявны вӧр-ваті. Тӧлын чери кыйӧм мода эз вӧв, а ӧні шойччан лунсӧ ӧдва виччыся. Прӧст кад лоас, сӧмын вугырӧн нокся.
Ӧти асылӧ Ӧльӧксан котӧрӧн пырис ме ордӧ.
— Гортын дізьвидзам, а йӧзыс кольӧм лунъясӧ Вадыб тыысь пестеръясӧн новлӧмны весьтӧн-джынйӧн кузьта ёкышъяс.
Ёртӧй пыр жӧ тшӧктіс лӧсьӧдчыны туйӧ, медым рыт кежлас воны местаӧдз. Ичӧтик жӧч банкаысь Ӧльӧксан петкӧдліс рис модаа чери сам: мотыль пӧ. Карысь мӧдӧдӧмаӧсь.
— Татшӧм сам вылад, — шуӧ, — сӧмын удит лэптавны, ёна шедӧ чериыд.
Ты дорӧ воим пемыднас. Йи вылӧ петӧм йылысь нинӧм и сёрнитны.
— Аски, — шуӧ Ӧльӧксан, — водзджык чеччам.
Узьмӧдчим вӧр керкаын. Ломтім кӧрт бӧчкаысь вӧчӧм пач. Сійӧ доналіс. Жырйын лои жар, кӧть пӧрччысь пасьтӧг да пывсьы. Войсӧ колльӧдім бура.
Асывнас чеччим водз, муртса вӧлі садьмӧ кыаыс. Ӧльӧксан тшӧктіс меным пусьыны, а ачыс лэччис ты дорӧ. Сійӧ воис час мысти кымын.
— Писькӧдалі розьяс, кӧсйи кыйсьыштны, но эз удайтчы, — ышловзис Ӧльӧксан. — Мотыльяс пыдди босьтсьӧма рис банка.
— Кы-дзи рис? — гӧгрӧсмисны синъясӧй. — Ме жӧ сійӧс юкваӧ кисьті.
Ӧльӧксан ӧзъян синъясӧн видзӧдліс ме вылӧ, кватитіс юква тыра пӧрт, петкӧдіс ывлаӧ да путкыльтіс лым вылӧ.
— Петав, любуйтчы, — скӧраліс сійӧ, — мотыльяссӧ пуӧмыд.
Гортӧ лэччим ӧта-мӧдысь торйӧн — Ӧльӧксан водзын, воськов кыксё сайын, а ме, мыжа кычи моз, бӧрас. Вежон-мӧд мысти ми, дерт, бурасим, бӧр кутім ӧтлаын ветлывлыны вуграсьны, но сійӧ кадсяньыс Ӧльӧксан пусьӧ ачыс.
Слова к тексту:
гежӧд — редкий
шляка — слякоть, мокрый снег
ытва — половодье
пӧжны — печь (о солнце)
тыра — полный
сэсь / сэтысь — оттуда
быдсяма — всякий
вугыр — рыболовный крючок
нидзув [нидзул-] — червь, черви
ышӧдны — соблазнить, увлечь
ротъявны [ротъял-] — бродить
мода — привычка
прӧст — свободный
ноксьыны — копаться
котӧрӧн — бегом
дізьвидзны — бездельничать
пестер — пестерь, кузов
весьт — пядь, четверть аршина
ёкыш — окунь
жӧч — жесть
рис модаа — похожий на рис
сам — приманка, наживка
лэптавны [лэптал-] — вытаскивать
узьмӧдчыны — заночевать
бӧчка — бочка
донавны [донал-] — накалиться, раскалиться
пӧрччысьны — раздеться
пасьтӧг — нагишом
пывсьыны — мыться в бане
колльӧдны — провести
муртса — как только, когда
кыа — заря
садьмыны — проснуться
писькӧдавны [писькӧдал-] — сверлить, пробить
розь — дыра, отверстие
гӧгрӧсмыны — округлиться
ӧзйыны — гореть
ӧзъян — горящий
кватитны — схватить
пӧрт — котел, котелок
любуйтчыны — любоваться
скӧравны [скӧрал-] — сердиться, злиться
лэччыны гортӧ — возвращаться домой
воськов [воськол-] — шаг
мыжа — виноватый
кычи = кычан — щенок
мысти — через
бурасьны — мириться
