Я. Конаков
МЫЙСЮРӦ ВОИС ӦНІӦДЗ
Выль во, сылысь медводдза лунсӧ уна народ лыддьӧ медыджыд праздникъясысь ӧтиӧн. Овлӧ, мый пасйӧны оз ӧти кадӧ. Та вылӧ индӧны либӧ традицияяс, либӧ официальнӧя примитӧм календарь. Россияын выль восӧ январь первой лунсянь Петр Первыйлӧн индӧд серти кутісны лыддьыны 1699 восянь. Сыӧдз выль воыс заводитчыліс сентябрь первой лунсянь. Тайӧ тӧлыссяньыс жӧ вӧлі и коми йӧзлӧн — паса пу святсі (календарь) серти. Археологъяс тӧдмалісны, мый ёна важӧн вӧлӧма мӧд ног. Выль воыс комияслӧн заводитчылӧма март помсянь, кор луныс да войыс ӧткузяӧсь.
Европаын выль восӧ январь первой лунсянь лыддьӧмыс топыда йитчӧма Христослы эскӧмкӧд. И веськалӧ тайӧ енмыслӧн «чужӧмсяньыс» (декабрь 25 лун) «Крещенньӧӧдзыс» (январь 7 лун) буретш шӧрас. Комияс кадсӧ нимтылісны «вежадырӧн». Тыдалӧ, ёна важӧн языческӧй енъяслы эскигӧн, тайӧ пӧраас вӧліны кутшӧмкӧ праздникъяс, кодъяс йитчылісны тӧвся шонді вежсьӧмкӧд, лун югыдыслӧн нюжавны заводитчӧмкӧд. Мый гӧгӧрвосьыліс пемыдсӧ югыдӧн вермӧмкӧд. Мыйсюрӧ сійӧ ылыс кадся праздникъясыскӧд йитчӧм традициясьыс воис ӧнія кадӧдз.
Православнӧй вичколӧн календарь серти январь 1 лун лыддьыссьӧ святӧй Василийлӧн лунӧн, комияс шуӧны сійӧс Василей лунӧн. Роч православнӧй вичко и ӧні арталӧ вояссӧ важ (юлианскӧй) ног, выль воыс заводитчӧ январь 14 лунсянь (григорианскӧй стиль серти).
Василей лунводзвывса праздниксӧ комияс пасйылісны сьыланкывъясӧн, йӧктӧмӧн, ворсӧмӧн. Аслысногӧн пасьтасьӧм йӧз, медсясӧ томъяс, ветлывлісны керкаысь керкаӧ, гажӧдчисны. Найӧс вӧлі колӧ гӧститӧдны мыйӧнкӧ. Ӧтияс гугӧдӧм пасяӧсь, мӧдъяс сарапанаӧсь. Нывбаба улас медсясӧ пасьтасьлісны том зонъяс. Тшӧкыда чужӧмсӧ тупкылісны марляӧн, тюльӧн, чышъянӧн, медым эз тӧдны. Татшӧм ногнас гажӧдчылісны святки чӧжыс. Тшӧкыда медавлісны, «ньӧблісны» та вылӧ кутшӧмкӧ керка, кодӧс нимтылісны ворсан керкаӧн.
Василей лунводзвывса войпукыс торъявліс мукӧдъяссьыс. Чукӧртчывлісны эз сӧмын ныв-зон, но и олӧмаджыкъяс. Быдӧн, коді кӧсйыліс. Ворсӧмыс и сьылӧмыс вӧлі топыда йитчӧма любовкӧд. Ӧткымын сьыланкыв бӧрын гозйӧдчысь ныв-зон окасьлісны, мый мукӧд войпук дырйи эз вӧчлывны.
Княжпогостскӧй районса Ляли да Кошки грездъясын гажӧдчӧмыс заводитчыліс ныв сьыланкывъяссянь. Нывъяс кык радӧн сувтлісны ӧта-мӧдныслы паныд да заводитлісны сьывны. Сэсся артмӧдлісны кытш, шӧрас пырліс кык зон, кодъяс бӧрйылісны аслыс кык нылӧс да сойбордйӧдыс босьтӧмӧн мыйкӧ дыра ветлӧдлісны кытш шӧрас. Та бӧрын нывъяс бара сувтлісны кытшас, а на пыдди бӧрйылісны мӧдъясӧс. Тадзи вӧчсьыліс сэтчӧдз, кытчӧдз став нылыс эз веськавлы кытш шӧрас. Сӧмын сэки нывъяс мӧдлісны сьывны йӧктан сьыланкывъяс. Сьывлісны медсясӧ медбура йӧктыны да сьывны кужысь нывъяс. Сьӧлӧм бурмӧм бӧрас босьтчылісны сідз шусяна ӧктысян сьыланкывйӧ, кӧні нывъяс шыасьлісны кутшӧмкӧ зон дорӧ, коді сэсся бӧрйыліс на пиысь кыкӧс да петкӧдліс джодж шӧрас. Кыкнан нылыс, чышъян помъяссӧ босьтӧмӧн, ветлӧдлісны керкаӧдыс да сьылісны «Сад йӧрын пӧ ныв гуляйтӧ». Сьыланкыв помассьӧм бӧрас бӧрйылісны аслыныс кык выль зонмӧс. Татшӧм ногӧн сьывлісны-ворслісны сэтчӧдз, кытчӧдз став том йӧзыс эз веськавлыны кытшас.
Василей лунводзвывса войпукас тайӧ грездъясас медтӧдчана ворсӧмъясысь ӧтиӧн вӧлі вогӧгӧрся бӧрйӧм. Нывъяс да нывбабаясӧн «Ты пусти в город» роч народнӧй сьыланкыв сьылігкості быд зон бӧрйыліс аслыс кажитчысь нылӧс. Петкӧдліс джодж шӧрӧ, окавліс, сэсся пуксьӧдліс пидзӧс вылас. Татшӧм нылыс во чӧж лыддьысьліс бӧрйӧмаӧн. Аслыссикас гӧтырпуӧн. Мукӧд коми сикт-грездас та кодь кымын ворсӧмыс овліс водзджык, Микайлӧ лунӧ (ноябрь 21 лун).
Уна ворсӧм комияслӧн йитчӧма аслысногӧн пасьтасьӧмкӧд. Паськалӧма вӧлі вӧлӧ пасьтасьӧм, но ворслісны эз быдлаын ӧтмоза. Шуам, Троицко-Печорскӧй районса Покча сиктын да Скаляп грездын Василей лун водзын войпук вылӧ кутшӧмкӧ керкаӧ чукӧртчывліс 20 зонмӧдз. Быдӧн сьӧрсьыс вайліс 7 шӧвк чышъян. Найӧс кӧртавлісны киясас («вӧжжи»), сьыліас («сийӧс»), коскас мышладорас («бӧж»). Быд зонлӧн киас ичӧтик жыннян, кодӧс кӧрталӧма сідз жӧ чышъянӧн. Тадзи пасьтасьӧм том йӧз пиысь бӧрйылісны ӧти юрнуӧдысь «вӧлӧс». Мукӧдыс кыкӧн-кыкӧн сувталісны бӧрас. Ӧти зон вӧлі «вӧв вӧтлысьӧн». Кор став ворсысьыс петавліс ывлаӧ, сійӧ плетьӧн вӧтліс «вӧвъяссӧ» сикт кузя некымын час чӧж. Ворсӧмсӧ видзӧдны чукӧрмыліс уна морт, торйӧн ёна кажитчыліс челядьлы. Гуляйтӧм бӧрын вӧлӧ пасьтасьӧм зонъяс бӧр пыравлісны керкаас и заводитлісны гажӧдчыны водзӧ. Сьывлісны-йӧктылісны нывъяскӧд ӧтлаын. Та дырйи ворсӧмсӧ панысьясыс и ыззьӧдлісны мукӧдсӧ. Сысольскӧй районса Куратово да Поёл сиктъясын аслысногӧн пасьтасьӧм йӧзыс шмонитігмоз нӧйтлісны идзасысь кыӧм плетьясӧн найӧс, кодъяс локтісны войпукны, но эз мынтысьлыны ворсан керка медалӧмысь. Та дырйи корлісны налысь гӧснеч.
Пасьтасьлывлӧны вӧлі и туриӧ. Некымын зон босьтлісны кианыс коколюка либӧ печкан. На вылӧ чӧвтлісны дӧра либӧ шебрас. «Турияс» кокавлісны ӧта-мӧдсӧ, видзӧдысьяссӧ. Та дырйи бӧръяясыс сералігтырйи зілисны пышйыны, дзебсьыны, кайлісны пӧлатьӧ, паччӧрӧ. Артмыліс гаж, ворсӧм. Уналаын пасьтавлісны гугӧдӧм пась, шапка, кӧмавлісны киссьӧм кӧті, гын сапӧг. Чужӧмсӧ дзеблісны саӧн мавтӧм дӧраторйӧн, тюльӧн, марляӧн. Усть-Куломскӧй районын татшӧм паськӧмсӧ шулісны «йӧгра-яранӧн». Пасьтасьлісны и мӧд паськӧмӧн. Зонъяс — нылӧ, нывъяс — зонъясӧ. Ворслісны гораньӧн.
Комияс важӧн лӧсьӧдлісны праздничнӧй ужын. Василей лунӧдзыс Сыктыв да Эжва вожъясын вӧлі пуӧны порсь юр да кокъяссӧ. Луныс сідзи и шусьыліс — порсь юр-кок вильӧдан лун. Лыддьывлісны, кӧть мыйкӧ закладӧ пукты, но тайӧ сёянсӧ лӧсьӧд.
Святки дырйи уналаын гадайтчылісны. Торйӧн нин нывъяс, кодъяс медсясӧ кӧсйисны тӧдмавны, кор петасны верӧс сайӧ да коді найӧс босьтас. Гадайтчылісны разнӧй ногӧн. Шуам, Василей лунводзса рытнас петавлісны гидӧ да кутавлісны коді ки улас сюрас. Ыж кӧ веськавліс — верӧс сайӧ петӧмыс оз ло, меж кӧ — мӧдарӧ, кынӧма ыж — ныв вермас регыд нӧбасьны.
Либӧ вӧчлісны мӧд ног. Кык-куим ныв лэччылісны ю вылӧ да пуксьывлісны йӧрдан гӧгӧр. Кианыс сермӧд. Матыстчывліс кӧ сэки зон да корліс сермӧдсӧ, лыддьылісны, мый ныв локтан воас петас верӧс сайӧ.
Гадайтчылісны и зарни чунькытшӧн. Сійӧс чӧвтлісны ва тыра стӧканӧ, стӧкансӧ пуктылісны тасьтіӧ, а тасьтісӧ лыа либӧ пӧим чукӧр вылӧ. Чунькытш вылас видзӧдлісны рӧмпӧштан пыр, коді сулавліс орччӧн. Вӧлі лыддьӧны, мый татшӧм ногӧн позьӧ аддзывны верӧспусӧ. Либӧ разьӧм кӧсаа нывъяс лэччылісны гӧбӧчӧ. Ӧти киас рӧмпӧштан, мӧдас — сартаса би. Видзӧдісны рӧмпӧштанас сэтчӧдз, кытчӧдз мыш сайӧдыс «оз мун» верӧспуыс.
Петавлісны и куим туй вомӧнасянінӧ. Выль вося войӧ. И кывзысьлісны. Кывлісны кӧ куимысь тотшкӧм шы, лыддьыссьывліс, мый сыладорас, кытысь сійӧ кыліс, кодкӧ кулӧ локтан воас.
Пуктывлісны нывъяс томналӧм ведраяс дорӧ асланыс юрси сіяса сынан. Асывнас кӧ тшӧтш аддзылісны бокӧвӧй мортлысь юрси, лыддьылісны, мый регыд петасны верӧс сайӧ. Гадайтчылісны и неуна мӧд ног. Томнавлісны куим ведра, а ключсӧ нывъяс пуктывлісны вой кежлас асланыс юрлӧс улӧ. Василей лунся асывнас петавлісны ывлаӧ. Первой паныдасьысь мортыс кӧ вӧлі мужичӧй, лыддьыссьыліс, мый матын верӧс сайӧ петан кад.
Гадайтчывлісны комияс эз сӧмын Выль вося войӧ, но и святки чӧжыс. Но верӧс сайӧ петӧмкӧд йитчӧм гадайтчӧмыс медся стӧчӧн лыддьыссьывліс буретш Василей лунводзвывса рытын. Сы вӧсна мый буретш сэки важ восӧ вежліс выльыс.
Слова к тексту:
лыддьыны — считать
официальнӧя — официально
примитӧм — принятый
индӧд — указание
паса — меченый, помеченный
святсі-календарь — святцы
ӧткузя — одинаковой длины
топыда — тесно, прочно
чужӧм — рождение
крещенньӧ — крещение
вежадыр — святое время
пӧра — пора
артавны [артал-] — считать
ворсӧм — игра
гугӧдӧм — вывернутый наизнанку
тупкыны — закрыть
медавны [медал-] — нанимать
войпук — посиделки, вечеринка
гозйӧдчыны — уединиться вдвоем юноше и девушке
окасьны — целоваться
кытш — круг
сойборд [сойбордй-] — рука
бӧрйыны — выбрать
вӧчсьыны — делаться, совершаться
кужны — уметь
сьӧлӧм бурмӧм — удовлетворение
сідз шусяна — так называемое
ӧктысьны — собирать, заниматься собиранием
йӧр — ограда
гуляйтны — гулять
вогӧгӧрся — годовой
бӧрйӧм — выбор
окавны [окал-] — целовать
аслыссикас — своеобразный
гӧтырпу — кандидат в жены
аслысногӧн — своеобразно
пасьтасьӧм — одевание
ӧтмоза — одинаково
вӧжжи — вожжи
сийӧс — хомут
мышладорас — к спине
жыннян — колокол
юрнуӧдысь — руководитель
вӧтлысь, вӧв вӧтлысь — погонщик лошадей
вӧтлыны — гнать, прогнать
чукӧрмыны — собраться
панысь (ворсӧм панысь) — начинающий (игру)
ыззьӧдны — возбуждать, будоражить, подстрекать
шмонитны — шутить, зубоскалить
нӧйтны — бить, побить
идзас — солома, соломенный
мынтысьны — расплатиться
медалӧм — наем, нанятый
гӧстинеч — гостинец
тури — журавль
коколюка — клюка
печкан — прялка
шебрас — одеяло, покрывало
кокавны [кокал-] — клевать
пышйыны — убежать
дзебсьыны — прятаться, спрятаться
пӧлать — полать
паччӧр — лежанка, верх русской печи
киссьӧм — рваный
кӧті — коты, кожаная обувь
гын сапӧг — валенки
дзебны — прятать, спрятать
са — сажа
дӧратор — кусок ткани
йӧгра — ханты и манси
яран — ненец
горань — игра в жмурки
вильӧдны — глодать, обглодать
заклад — заклад
уналаын — во многих местах
гадайтчыны — гадать, заниматься гаданием
гадайтны — гадать
гид — хлев
кынӧма — беременная
нӧбасьны — беременеть, забеременеть
йӧрдан — прорубь
сермӧд — узда, уздечка, привязь
зарни — золото
чунькытш — кольцо, перстень
чӧвтны — бросить, кинуть
пӧим — зола
рӧмпӧштан — зеркало
верӧспу — кандидат в мужья
разьӧм — расплетенный (распущенный)
сартас — лучина
вомӧнасянін — перекресток
кывзысьны — подслушивать (слушаться)
тотшкӧм — стук, постукивание
сыладор — та сторона
кувны — умереть
пуктыны — положить
томналӧм — запертый
томнавны [томнал-] — запереть
ведра — ведро
сі — волокно
сынан — расческа
юрлӧс — подушка
