Н. Конаков
КЫДЗИ КОМИЯС ЧЕЛЯДЬСӦ ВЕЛӦДІСНЫ...
Муртса сувті ас кок йылӧ,
Удж пыр меным вичмис:
Зыбка дорын ӧввӧ сьывны,
Ичӧт кага видзны.
Нёбдінса Виттор.
Кыдзи и мукӧд войтыр, коми йӧз ассьыныс челядьнысӧ войдӧр зілисны ичӧтысянь сибӧдны удж бердӧ, ӧкмыс-дас арӧса челядь ваявлісны нин муяс вылысь нянь, петкӧдлісны куйӧд. Дас ӧти-дас куим арӧса зонкаяс ас кежсьыныс нин гӧрлісны му, а накӧд тшӧтшъя нывкаяс ветлывлісны турун пуктыны. Дас куим-дас нёль арӧса нывкаяс сяммылісны нин уджавны кысян станъяс вылын да вӧчлісны вылӧ донъялана дӧраяс. Дась нёль-дас вит арӧса зонкаясӧс эз нин ӧтдортлыны вӧралан артельясын да радпырысь босьтлісны ас дораныс. Унаӧн тайӧ арлыднас уджалісны нин артельясын.
Дерт, эз видзӧдны сӧмын арлыд вылӧ, а донъявлісны сійӧс, кутшӧмджык том мортыслӧн тэчасногыс, уна-ӧ вын-эбӧсыс. Эм-ӧ сылӧн сямыс, удж дінас писькӧслуныс да сюртчӧмыс. Нёль-вит арӧса зонкаясӧс пуксьӧдлывлісны вӧв мыш вылӧ, а войвывса кӧр видзысьяс, быдтасыс кӧ сяммӧ кутны киас харей, сетлісны нин сылы кӧра доддьӧн веськӧдлыны.
Квайт-сизим арӧса нывкаяслы тшӧктылісны идравны олан жыръяс, дасьтыны сёян-юан, кольлісны видзны кага.
Бать-мам век зілисны, мед эськӧ налӧн челядьыс ичӧтысянь велалісны кыйсян уджӧ, эз торкны нэмъясӧн чӧжсьӧм оласног, мед эз пакӧститчыны йӧзлӧн кыйсян угоддьӧясын, пыдди пуктісны йӧзӧс.
Том гозъялӧн кӧ чужас кага, вӧлі юалӧны: «Вотӧс вотысь али чукчи вайысь чужис?» Либӧ: «Вӧрӧ кайысь али пачӧ видзӧдысь?» Посни челядь йылысь шуалісны: «Квайт тӧлысся нылыс ӧд чӧрс кузя аддзӧ, а зон — ружье ствол кузя».
Кор детинка сӧмын на заводитӧ сёрнитны да гӧгӧрвоны мукӧдлысь сёрнисӧ, бать-мам пыр и зільӧны висьтавлыны вӧралӧм йылысь пӧслӧвичаяс, шусьӧгъяс, мойдъяс.
Челядьӧс баййӧдлігӧн бать-мам сьывлісны сэтшӧм сьыланкывъяс, кодъяс эськӧ тшӧтш бурӧ велӧдісны быдтассӧ.
Важ йӧз ёна пыдди пуктывлісны бур вӧралысьясӧс, та вӧсна и баййӧдлан сьыланкывъясын эмӧсь татшӧм кывъяс: «Баю-бай, папыд вӧрӧ мунӧма, сьӧла-уръяс кыявны, кӧчьяс-ручьяс лыявны». Бӧрынджык, кор быдтасыс лоӧ ыджыдджык, сэки бара аслыссяма сьыланкывйӧн водтӧдлісны сійӧс да шуавлісны: «Мед дедыд кодь жӧ лоан кыйысь да вайысь, ӧтпыр лыйӧмӧн пӧтка уськӧдысь!» Либӧ «Кӧр вӧтӧдан пӧ дай кокъяснад, ур пезьгӧдан пӧ дай чуньяснад, дозмӧр лыян пӧ дай синъяснад, вӧрысь пӧ потшкалӧмӧн вайысь».
Эз ӧд весь коми челядьлы ворсанъясӧн вӧвны вӧралӧм-кыйсьӧм. А чачаяснас — ньӧввуж да ньӧв, пуысь вӧчӧм пищаль. Тӧлын челядь ворслывлісны «синдзебӧн».
Ӧти челядь чукӧрлӧн юрнуӧдысьыс дзеблывліс кодӧскӧ лым пиӧ, кодӧскӧ идзас улӧ. Ачыс волывліс мӧд челядь чукӧр дорӧ, кодъяслы колӧ корсьны дзебсьӧмаясӧс. Первойя юрнуӧдысьӧс кутісны пась либӧ пальто пӧлаӧдыс. Дзебсьӧмъяс дорӧ матыстчигӧн налӧн юрнуӧдысьыс горӧдлывліс: «Кынь локтӧ, сан локтӧ». Татшӧм ворсӧмъясыс водзӧ вылӧ вӧралысьӧс велӧдлісны лоны сюсьӧн, кужысьӧн, быдтор терпитысьӧн.
Квайт-сизим арӧса зон челядь босьтчывлісны нин асьныс кыйны вӧрса посни лэбачьясӧс: жоньясӧс, пыстаясӧс, уркайясӧс.
Тӧлын челядь ёна кыйлывлісны уркайясӧс, кодъяс колля воясӧ ыджыд кельӧбъясӧн матыстчывлісны сиктъяс дорӧ. Уркайяссӧ косьтывлісны да наысь пулывлісны шыд. Бать-мам пыдди пуктывлісны челядьлысь кыйсьӧмсӧ, ӧд век нин содтӧд сёян лоӧ.
Медся прӧстӧй кыйсянторнас вӧвлі «дзуг», сійӧс челядь вӧчлывлісны асьныс. Озыр воясӧ ӧти том вӧралысь кыйліс уркайсӧ сюрсӧдз.
Кӧкъямыс-ӧкмыс арӧса вӧралысь зонлӧн вӧвлі нин аслас лямпа, сылысь пыдӧсъяссӧ эз эжлыны камысӧн. Зонъяслы вурлывлісны дукӧс, сы вылӧ вӧлі павкнитсьӧ ещӧ ӧти паськӧм, пытшкӧс зепъяса, шусьыліс лазйӧн. Сӧмын челядьлы вурӧм лазъяс эз вӧв чер новлӧдланіныс.
Гырысьджык челядь ветлывлісны вӧравны сиктъяссяньыс ылӧджык. Баддя да расъяса местаясын найӧ тӧвбыд петляясӧн кыйисны таръясӧс, сьӧдбӧжъясӧс. Ӧкмыс-дас арӧсӧн челядьӧс батьыс босьтлывліс нин аскӧдыс вӧрса угоддьӧяс кытшовтлыны.
Коми вӧралысьяслӧн кыйсян-вӧралан угоддьӧясыс вӧвліны оланінъяссяньыс уна дас километръяс сайын. Угоддьӧ шӧрас морт кыпӧдлывліс вӧр керка да кыйдӧс видзанінъяс. Тайӧ керкасяньыс ӧтарӧ-мӧдарӧ разавлісны чӧс туйяс да лэч туйяс, быдлаын вӧвліны лӧсасъяс, найӧ петкӧдлісны, кӧнӧсь вӧралысьяслӧн налькъясыс да самоловъясыс. Вӧралан угоддьӧясын дед либӧ бать внук-пи дырйиыс октывліс налькъяс, велӧдліс, кытчӧ найӧс колӧ пуктыны, тӧдмӧдліс зверь кок туйясӧн.
Дерт, вӧралан уджын челядьысь ыджыд отсӧгыс эз вӧвлы, но найӧ зіля вермылісны чукӧртны пелысь розъяс да ӧшлыны найӧс колана местаясӧ, октыны сьӧла лэчьяс. Бӧрынджык челядь асьныс нин вермисны видлавны налькъяс да лэчьяс. Дерт, опыта вӧралысь кӧ казявліс, мый велӧдчысьыслӧн эм нин сямыс, сэк сійӧс лэдзліс ӧтнассӧ.
Челядьӧс вӧравны велӧдігӧн быть колӧ вӧлі тӧдны да пыдди пуктыны прӧмышляйтысьяслысь моральсӧ, сійӧ гижтӧм законъяссӧ, кодъяс нэмъясӧн чӧжсисны да олісны коми вӧралысьяс пӧвстын. Кыдзи колӧ асьтӧ кутны вӧрын, мый позьӧ вӧчны да мый оз позь. Оз ков вежавны, мукӧдлы кӧ бурджыка мойвиас. Оз ков ошйысьны и аслад удачаӧн. Том вӧралысьясӧс велӧдісны, мед найӧ не сӧмын кыйисны, но и дӧзьӧритісны зверьясӧс, лэбачьясӧс да вӧрса быдмӧгъяс. Вылыс Эжваса коми вӧралысь висьталіс: «Менӧ дедӧ велӧдліс кыйсьыны да тшӧкыда шулывліс: коланлунтӧг пӧ эн вӧрӧд».
Ӧкмыс-дас арӧса зонъясӧс батьясыс босьтлывлісны нин пищальӧн вӧравны. Тайӧ арлыднад налы сетлывлісны нин лыйсьыны пищальысь. Велӧдлісны, кыдз зарад вӧчны, кыдзи пищальнас вӧдитчыны. Арӧс дас кыка зонлӧн аслас нин вӧвлі ичӧт калибра пищаль. Татшӧмторйыд коми зонкаыдлы вӧвлі медся ыджыд шудӧн.
Вӧравны велӧдчӧмысь ӧтдор, челядь ичӧтысянь кужлісны войын кӧть лунын тӧдмавны, кутшӧм местаынӧсь найӧ, кодарӧ колӧ мунны, кодлӧн кӧні сулалӧ вӧр керкаыс да уна мукӧдтор.
Дас квайт арӧса зонъяс асьныс нин ветлывлісны дыр кадся прӧмысъяс вылӧ. Мукӧддырйи прӧмышляйтан артельясӧ сюсь вӧралысьяс босьтлісны дінаныс и томъясӧс. Дерт, первой пӧраӧ прӧмыссӧ сылы эз юклывны ӧткодь пайӧн, сетлісны пай джын либӧ нёльӧд пай. А кодыр том вӧралысьлы юклісны ӧткодь пай, сэк сылы колӧ вӧлі мукӧдсӧ гӧститӧдны-юктавны да вердны.
Слова к тексту:
вичмыны — найтись
зыбка — зыбка, колыбель
ӧввӧ — бай-бай
видзны кага — нянчиться
сибӧдны — допускать
ваявны [ваял-] — носить, возить
куйӧд — навоз
ас кежсьыныс — они самостоятельно
гӧрны — пахать
тшӧтшъя — одного возраста
турун пуктыны — ставить сено
сяммыны — уметь
кысян стан — ткацкий станок
донъявны [донъял-] — оценить
ӧтдортны — считать чужим
вӧралан — охотничий
тэчасног — строение, телосложение
вын — сила, крепость
эбӧс — сила
писькӧслун — проворность
сюртчӧм — чувство товарищества
быдтас — воспитанник
харей — хорей, палка для управления оленями
веськӧдлыны — управлять
велавны [велал-] — научиться
торкны — нарушать
чӧжсьӧм — накопившийся, накопленный
пакӧститчыны — делать пакости
угоддьӧ — угодье
пыдди пуктыны — уважать
чукчи — глухарь (самец)
чӧрс — веретено
пӧслӧвича — пословица
шусьӧг — поговорка
баййӧдлыны — баюкать
сьӧла — рябчик
лыявны [лыял-] — стрелять, подстреливать (многокр гл.) лыйны — застрелить
бӧрынджык — позднее
водтӧдны — уложить
ӧтпыр — один раз
уськӧдны — уронить
вӧтӧдны — догнать
пезьгӧдны — застрелить
потшавны [потшал-] — нанизать на жердь
весь — праздный
ворсан — игра
ньӧввуж — лук (для стрельбы)
пищаль — ружье
синдзеб — прятки
пӧла — пола, борт
кынь — песец
сан — росомаха
водзӧ вылӧ — на будущее
терпитны — терпеть
босьтчыны — браться, приниматься
жонь — снегирь
пыста — синица
уркай — клест
коль — шишка
колля — урожайный на шишки, с шишками
кельӧб — стая, стайка
содтӧд — прибавка
кыйсянтор [кыйсянторй-] — охотничьи снасти
дзуг [дзугй-] — силки
лямпа — охотничьи лыжи
пыдӧс — дно, нижняя часть чего-либо
эжны — обить
камыс — полоса шкуры с оленьей ноги
дукӧс — армяк, зипун
павкнитны — набросить, накинуть
зеп [зепт-] — карман
лаз — накидка с кожаным верхом от дождя
чер — топор
новлӧдланін — приспособление для ношения чего-либо, футляр
бадь [баддь-] — ива, ивняк
сьӧдбӧж — горностай
кытшовтны — обойти вокруг чего-либо
кыйдӧс видзанін — место для хранения охотничьего промысла
кыйдӧс — добыча
разавны [разал-] — разойтись
чӧс [чӧск-] — охотничья ловушка
чӧс туй — охотничья тропа с ловушками
лэч [лэчк-] — силок, ловушка
лӧсас — зарубка (на дереве)
нальк [налькй-] — вид ловушки для мелких зверей
самолов — вид ловушки
пелысь — рябина
роз — гроздь
ӧшлыны — развешивать
колана — нужный
октыны — поставить силок, взвести курок
лэдзны — отпустить
прӧмышляйтысь — промышляющий (сущ.)
мойвины — посчастливиться
ошйысьны — хвастаться
дӧзьӧритны — беречь
вӧрӧдны — трогать
коланлун — надобность, необходимость
вӧдитчыны — обращаться с чем-либо, пользоваться чем-либо
татшӧмтор [татшӧмторй-] — такое (сущ), это (сущ)
кодарӧ — в какую сторону
мукӧдтор [мукӧдторй-] — остальное
прӧмыс — промысел
юкны — делить
пай — пай, доля
юктавны [юктал-] — поить
октыны — поставить силок
